Научниците за првпат документираа редок и шокантен случај на „граѓанска војна“ кај мајмуните од видот шимпанза, во кој најголемата позната заедница на овие примати во светот се поделила на две ривалски групи, а конфликтот завршил со убиства на возрасни единки и младенчиња.

Според истражувањето објавено во научното списание Science, вакви трајни поделби кај шимпанзата се исклучително ретки и, според генетските анализи, се случуваат во просек еднаш на секои 500 години.

Истражувањето било спроведено во Националниот парк Кибале во Уганда, каде научниците речиси 30 години ја следеле заедницата шимпанза позната како Нгого, која долго време функционирала како стабилна и обединета група.

Но во 2015 година започнале првите знаци на поделба. Истражувачите забележале дека западниот и централниот дел од групата сè почесто се избегнуваат меѓусебно. Овој процес се совпаднал со промени во машката хиерархија и со смртта на неколку возрасни мажјаци, кои претходно играле важна улога во одржувањето на единството.

До 2018 година, заедницата целосно се поделила на две одделни групи, секоја со своја територија. По поделбата започнале серија насилни напади, при што западната група нападнала и убила повеќе членови од централната група.

Во периодот од 2018 до 2024 година, научниците директно забележале или со голема сигурност реконструирале седум напади врз возрасни мажјаци и 17 убиства на младенчиња, што претставува еден од најекстремните примери на внатрешен конфликт забележан кај диви шимпанза.

-Она што е особено вознемирувачко е што шимпанзата убиваат поранешни членови на својата заедница. Новите групни идентитети очигледно станале посилни од врските што ги граделе со години, изјавил антропологот Арон Сандел од Универзитетот во Тексас.

Научниците сметаат дека ова откритие може да помогне подобро да се разбере и човечкото однесување. Според Сандел, ако шимпанзата можат да развијат смртоносни конфликти без јазик, етнички разлики или идеологија, тогаш и кај луѓето причините за поделби можеби лежат во подлабоки, основни механизми на групна припадност.

Ова е само втор познат случај на ваква поделба кај шимпанза. Првиот бил забележан во 1970-тите во Гомбе, Танзанија, за време на истражувањата на познатата приматолог Џејн Гудал, но тој случај долго време бил предмет на дебати.

Новото истражување, сепак, нуди најсилен доказ досега дека дури и кај нашите најблиски роднини во животинскиот свет може да се појават долготрајни и насилни внатрешни конфликти, потсетник дека борбата за моќ и припадност е длабоко вкоренета во природата.