Македонија мора да најде решение за европскиот пат, но не решение што ќе отвори нови прашања за македонскиот идентитет, историја и јазик – порача министерот за јавна администрација и генерален секретар на Движењето ЗНАМ – За наша Македонија, Горан Минчев, во гостувањето во „Само интервју“ на ТВ „Канал 5“, се вели во партиското соопштение што МИА го пренесува интегрално.

Минчев посочи дека прашањето не е само дали Бугарите ќе бидат внесени во Уставот, туку што ќе се случи потоа. „Хипотетички, утре да ги внесеме Бугарите во Уставот. И што следно? Ако следното барање биде Гоце Делчев? Има ли Македонец што ќе се согласи дека Гоце Делчев не е Македонец?“, праша Минчев.

Тој нагласи дека Македонија не може да прифаќа процес без гаранции дека по едно исполнето барање, нема да следуваат нови. „Ние имаме ситуација каде што од бугарска страна постојат ставови дека Македонците постојат по 1945 година или дека македонскиот јазик е дијалект на бугарскиот јазик. Тоа не се само историски прашања, туку прашања што го допираат темелот на македонскиот идентитет“, рече Минчев.

Минчев го постави и прашањето како може Македонија да прифаќа определени толкувања на историјата, а да се игнорираат настаните и жртвите. „Пред неколку дена бев во Ваташа, каде што им оддадовме почит на 12-те младинци, жртви на едено тешко историско злосторство. Тоа било масакр, трагедија, која народот не ја заборава. И замислете перверзија. Венко Филипче и СДСМ полагаат цвеќе таму, а во исто време велат дека ако Бугарите се внесат во Уставот, треба да се признае дека биле „бугарски администратори“, а не „окупатори“, истакна Минчев.

Според него, Македонија не може да дозволи европскиот процес да значи прифаќање на тези со кои се оспорува македонската посебност. „Не може да се бара од нас да прифатиме дека нешто што е дел од нашата историја и идентитет е предмет на преговарање. Ние мораме да најдеме начин да излеземе од оваа состојба, но тоа не значи да излеземе по секоја цена. Македонија мора да оди кон Европската Унија, но како рамноправна држава, со свој јазик, историја и идентитет“, порача Минчев.

Движењето ЗНАМ продолжува да се залага за политика што ја става Македонија над партиските интереси, за европска иднина, силни институции и држава што знае да преговара, но и да ги брани своите темели.

Фото: Центар за комуникации и аналитика ЗНАМ