Портпаролот на иранското Министерство за надворешни работи, Есмаил Багеи, денеска изјави дека министерот за надворешни работи Абас Арагчи, и претседателот на парламентот, Мохамед Багер Калибаф, добиле официјална покана од Пакистан да го посетат Исламабад, со цел разговор за постигнување решение во конфликтот со Соединетите Американски Држави.
Багеи изјави дека Арагчи и Калибаф ќе го посетат Пакистан „во соодветно време“, без да наведе детали за времето на посетата, пренесува Ал Џезира.
– Реципрочните посети и размената се природен дел од растечките врски меѓу двете соседни земји – рече Багеи.
Пакистан играше посредничка улога во разговорите меѓу Вашингтон и Техеран во настојувањето за деескалација на тензиите, вклучително и помош во посредувањето за прекин на огнот во април, како и за време на постигнувањето рамковен договор во јуни.
Договорот пропадна минатиот месец, кога двете страни почнаа да се напаѓаат во период од речиси две недели, пред американскиот претседател Доналд Трамп да нареди прекин на бомбардирање на цели во Иран, по што следуваа извештаи дека се иницирани преговори за решавање на конфликтот.
