Амбасадорот на Јужна Кореја во Украина денеска се врати во татковината, соопшти јужнокорејското Министерство за надворешни работи, во услови на дипломатски спор околу откривањето доверливи информации за префрлање во Сеул на севернокорејски воени заробеници.
Пред неколку дена Јужна Кореја соопшти дека го повлекува својот амбасадор од Киев, критикувајќи го украинскиот претседател Володимир Зеленски затоа што јавно споменал можно префрлање во Сеул на двајца севернокорејски војници заробени од украинската армија. Јужнокорејските власти сакале прашањето да остане доверливо.
Претседателот на Јужна Кореја, Ли Џе-мјунг, побара официјално извинување, изразувајќи загриженост дека објавувањето на овие информации би можело да ги загрози семејствата на воените заробеници. Како одговор, портпаролот на украинското Министерство за надворешни работи изјави дека „дипломатијата треба да надвладее над емоциите“.
Одлуката на Сеул следува и по написот објавен неделава во британскиот весник „Гардијан“, според кој во јули и август од Јужна Кореја во Русија биле испратени 176.000 тони производи, главно дизел-гориво. Испораките предизвикаа остри критики од Киев.
Јужнокорејската влада се закани дека ќе преземе „дополнителни мерки“, без да прецизира за какви мерки станува збор.
