Најмалку пет лица загинаа, а повеќе од десет се повредени во вооружен напад што се случи денеска во центарот на полскиот град Краков. Напаѓачот е совладан од полицијата, а мотивите за нападот засега се непознати.
Инцидентот се случил нешто по 15 часот на главниот градски плоштад „Ринек Глувни“, една од најпознатите туристички локации во Краков. Според првичните информации, напаѓачот пристигнал со автомобил и отворил оган кон случајни минувачи.
Полициските и итните служби веднаш интервенирале на местото на настанот. При обидот за негово приведување дошло до престрелка, при што напаѓачот бил ранет од полицијата и пренесен во болница. Меѓу повредените има и двајца полициски службеници.
Според информациите објавени од полските медиуми, осомничениот е 25-годишен маж, а полицијата засега смета дека дејствувал сам.
Полскиот премиер Доналд Туск соопшти дека е редовно информиран за случувањата и дека полицијата ги истражува мотивите и позадината на нападот. Министерот за правда Валдемар Журек изрази сочувство до семејствата на жртвите и порача дека сторителот ќе сноси целосна одговорност.
Засега нема официјална потврда дека станува збор за терористички напад, ниту се соопштени мотивите на осомничениот. Истрагата е во тек.
