Софистицирани дронови можат да доставуваат огромно количество дрога и оружје во затворите, што претставува закана по националната безбедност, се наведува во годишниот извештај на надзорното тело на британските затвори.
Главниот инспектор на британските затвори, Чарли Тејлор предупреди дека полицијата и затворските служби го препуштиле воздушниот простор над затворите на криминалните банди.
– Технологијата на дроновите напредува многу брзо. Нивото на ризик што го носат овие дронови е различно од сè што сме виделе досега, посочи Тејлор, додавајќи оти постои и теоретски ризик дека осуденик може да избега од затвор со помош на беспилотно летало.
Тој ја повика затворската служба итно да преземе контрола над ситуацијата.
Би сакале Владата и безбедносните служби да ги здружат силите, да користат технологија и разузнавање за да спречат реализација на овој ризик, наведе Тејлор.
фото: ЕПА
