Албанскиот претседател Илир Мета смета дека решението за политичката криза во земјата се избори.
Посочува дека нема демократија без избори и оти нерешавањето на кризата му служи на малцинството кое „ не сака отворање на преговори со Европската унија“
-Единствено решение се изборите. Без избори нема демократија. Без демократија нема независна правда. Без овие две нешта, нема права и економија за сите Албанци, ниту казна за политичарите. Нерешавањето на кризата му служи само на малцинството кое не ја признава ротацијата и не сака отворање на преговорите на Албанија со Европската унија, бидејќи постепено ќе ја изгуби својата незаконска политичка, економска и медиумска моќ. Доаѓа 18 октомври, напиша Мета на Фејсбук.
Претседателот Мета претходно, во неколку наврати, за излез од кризата предложи одржување на локалани, предвремени парламентарни, а ако е „тоа решение и претседателски избори“, на 13 октомври.
За овој датум, со уредбата од 27 јуни, Мета ги презакажа локалните избори, датум што не го признава владејачкото мнозинство предводено од социјалстите, и изборите ги спроведе на 30 јуни, врз основа на уредбата од декември минатата година.
За социјалистите, како што изјави генералниот секретар Таулант Бала, изборите на 30 јуни се завршена работа и оти следни се парламентарните во 2021 година
Изјавата на Бала следуваше откако опозициската Демократската партија излезе со став дека единствен акт кој е во сила, според Уставот а во врска со локалните избори, е уредбата на Претседателот Илир Мета.
