Градот Скопје и ЈП „Водовод и канализација“ годинава започнуваат со реализација на проектот за изградба на Пречистителна станица за третман на отпадни води во Скопје, како најголем еколошки проект во градот во вредност од 136 милиони евра. Со проектот ќе се прочистат 90 проценти од водите во Скопје.

Во просториите на ЈП „Водовод и канализација“ – Скопје, денеска беа отворени тендерските понуди за дизајн и изградба на оваа пречистителна станица на која присуствуваа градоначалничката на Град Скопје, Данела Арсовска, директорот на ЈП „Водовод и канализација“, Златко Перински и претставници на Европската делегација, Европската банка за обнова и развој (ЕБОР), Европската инвестициона банка (ЕИБ) и Инвестиционата рамка за Западен Балкан (ВБИФ) – ИФИ Канцеларијата за координација (ИФИЦО).

Градоначалничката Арсовска истакна дека изградбата на оваа пречистителна станица е „најголем еколошко-капитален проект за Скопје и скопјани“, додавајќи дека на овој начин конечно ќе се овозможи третман на урбаните отпадни води согласно ЕУ стандардите.

– Со изградба на оваа пречистителната станица за третман на отпадни води, Скопје конечно има можност да се развива во еколошка метропола која се грижи за животната средина и се грижи за скопјани. Ако досега отпадните води одеа директно во Вардар, притоа свесно загадувајќи ја животната средина и јавното здравје, сега конечно ќе имаме можност активно да делуваме, да ги менуваме работите и да ставиме крај на загадувањето на реката Вардар, на градот, но пред се дa обезбедиме подобра вода за пиење на населението и да го подобриме квалитетот на живот на скопјани, рече Арсовска.

На настанот се обрати и претставникот на Европската инвестициона банка (ЕИБ) Алесандро Брагонзи кој истакна дека овој проект е од огромно значење за жителите и за Градот Скопје. Брагонзи посочи дека од голема важност е што проектот се одвива непречено и со одлично темпо и додаде дека со финализација на овој проект ќе се реши проблемот со отпадните води, ќе се зачува животната средина и граѓаните на Скопје ќе имаат почиста вода.

Директорот на ЈП „Водовод и канализација“, Златко Перински во своето обраќање ги презентираше постапките на реализација на овој значаен еколошко-капитален проект, осврнувајќи се на важноста на изградбата на пречистителната станица, за која вели дека ќе овозможи Скопје да има над 90 проценти  прочистени води.

– Иницијативата за ваков тип на проект со кој што конечно ќе се воведе еколошки систем за прочистување на водите во Скопје е уште од 2007 година, повторно актуелизирајќи го ова прашање во април 2017 година, со изработка на Студија за финансирање, градење и работење постројка за третман на отпадни води за главниот град Скопје – Уникатен документ Студија за изводливост, како надградба на претходната Физибилити студија. По долг процес на консултации, изработка на техничка документација и активен ангажман на цел тим професионални во оваа област, денеска можеме конечно да најавиме дека сме во фаза пред отпочнување на изградбата на пречистителна станица за отпадни води во Скопје. Со овој проект инвестираме во Скопје, за нашите сограѓани, но креираме и подобра иднина за идните генерации, истакна Перински.

Перински се заблагодари на Европската банка за обнова и развој, Европската инвестициона банка и Инвестиционата рамка за Западен Балкан за финансиската поддршка за реализација на овој проект, додавајќи дека изградбата на пречистителната станица ќе започне годинава.

Пречистителната станица за отпадни води – Скопје ќе се простира на површина од 13 хектари, во општина Гази Баба, на левиот брег на реката Вардар, во реонот на Трубарево и ќе биде со капацитет од еквивалент на 500.000 жители.