Владите на ЕУ мора да работат на создавање европски сили за брза реакција за да бидат подобро подготвени за идните кризи како онаа во Авганистан, изјави високиот претставник за надворешна политика и безбедност на ЕУ, Жозеп Борел.
Во интервју објавено денеска, Борел за италијанскиот весник Кориере дела Сера рече дека повлекувањето на американската војска од Авганистан по брза постапка, бидејќи безбедноста опадна, покажа дека ЕУ мора да ги засили напорите за изградба на заедничка одбранбена политика.
– Мораме да извлечеме поуки од ова искуство. Kако Европејци не можевме да испратиме 6.000 војници на аеродромот во Кабул за да ја обезбедат областа. САД можеа, а ние не, нагласи тој.
Борел додаде дека ЕУ со 27 земји-членки треба да има иницијална почетна сила од 5.000 војници и дека за тоа е потребна брза реакција.
Во мај, 14 земји на ЕУ, вклучително и Германија и Франција, предложија создавање таква армија, со можни бродови и авиони, за да им помогнат на странските демократски влади на кои им е потребна итна помош.
