Разговорите на македонско-грчката комисија за трговски марки се водат во рамки на Договорот од Преспа и на паритетна основа, изјави денеска владиниот портпарол Миле Бошњаковски.

-Во Договорот од Преспа е јасно утврдена рамката во која преговараат двете комисии за трговските марки. Тоа што е исклучително важно е дека се работи на паритетна основа и во духот на добрососедство и пријателство. Што значи се усогласуваме на пријателски и добрососедски начин и тоа на паритетна основа, тоа значи дека догоовреното ќе важи и за едната и за другата страна. Работата на оваа комисија ќе потрае, нема да биде веднаш завршена, ќе има повеќе сесии, меѓутоа секогаш кога ќе има значителен исчекор ќе ја информираме јавноста во детали што е договорено и како, вели Бошњаковски на новинарско прашање каква е нашата позиција во оваа комисија која заседава денеска во Солун.

Конкретно во случајот за виното, тој потсети дека е веќе договорено дека кога ќе се каже македонско вино тоа ќе се однесува за сите вина произведени во регионот Македонија, односно географското подрачје на Македонија кое опфаќа повеќе земји.

Димовски: Во јуни пленарка

Иницирајќи ја Меѓународната група на експерти меѓу РС Македонија и Грција за имињата за комерцијална намена, трговските марки и заштитните знаци, донесовме заклучок и ги поставивме политичките основи за одржување на првата пленарна седница на Групата во јуни годинава.

Ова се наведува во заедничката изјава по средбата меѓу државниот секретар во Министерството за надворешни работи на Македонија, Виктор Димовски, и генералниот секретар за меѓународни економски односи во грчкото МНР, Јоанис Брахос, одржана денеска во Солун.

Во заедничката изјава на Димовски и Брахос, како што соопшти МНР, стои дека во тој контекст, беа потпишани и упатени писма до Заводот за интелектуална сопственост на Европската Унија (ЕУИПО) и Светската организација за интелектуална сопственост (СОИС) со кои истите беа поканети да номинираат експерти кои ќе ја советуваат Меѓународната група на ад-хок основа. 

– Ваквиот цврст чекор кој е неразделно поврзан со институционализираниот дијалог меѓу деловните заедници на нашите две земји претставува опиплив доказ за нашата целосна посветеност на Преспанскиот договор, како и за нашите продолжени напори во насока на продлабочување на соработката во интерес како на развојот на билатералните односи, така и на регионот во целост, се посочува во заедничката изјава на генералниот секретар на МНР на С. Македонија Димовски и генералниот секретар за меѓународни економски односи во грчкото МНР, Брахос.