Раководителка од голема бугарска туристичка агенција била задржана од сопственик на вила за станување во Охрид, откако ги изгубила парите за ноќевање, исхрана и празничната новогодишна вечера за група од 65 туристи од Софија, пишува бугарскиот медиум Монитор.
Во 10 часот утринава автобусот со бугарските туристи тргнал кон Софија, но без водачот.
„Сопственикот на вилата во која престојувавме и ги зеде личните документи и рече дека таа нема да тргне додека не го уреди плаќањето“, соопштиле некои од туристите.
Тие пристигнале во Охрид на 30 декември според програмата на голема бугарска туристичка агенција. Аранжманот бил за две ноќевања во вила во центрот на Охрид со празнична вечера во еден од рестораните. Само што пристигнале, жената која ја водела групата им соопштила дека ги загубила парите, вкупно околу 3500 евра.
Така, целата програма и расположенито на туристите се уништиле откако се покажало дека ниту ќе можат некаде да се сместат, ниту ќе имат што да јадат. Тогаш во преговори се вклучил сопственикот на вилата.
„Тој и ги одзел документите на жената како гаранција дека нема да ја напушти Македонија и ќе остане во Охрид додека не се плати сметката“, изјавил за Монитор извор од групата.
Сопственикот на вилата бил гарант во ресторанот дека гостите ќе ја платат новогодишната вечера и прослава. Според Монитор, бугарски дипломат во Македонија веќе стапил во контакт со Бугарката чии документи биле задржани.
