Попладнево, бугарското Министертсв за надворешно работи објави што било договорено и што бара Бугарија од Македонија. Еве го соопштението на бугарското НР:

„Бугарија беше принудена да ја одложи поддршката за почеток на преговорите за членство на Македонија во ЕУ на состанокот на Советот за општи работи одржан на 22 јуни 2021 година. На истиот состанок, Бугарија даде позитивна оценка за достигнувањата на Република Албанија во реформскиот процес и рече „да“ за усвојување на нејзината рамка за преговори.

Позицијата на нашата земја за европската перспектива на нашиот близок сосед, Република Северна Македонија, е конзистентна и јасна. Тоа е во согласност со нашето убедување дека политиката на проширување на ЕУ треба да се заснова на исполнување на критериумите од Копенхаген за членство во Унијата и принципите на сопствените заслуги. Бугарската страна продолжува да се држи до сигурни гаранции дека нашите фундаментални интереси нема да бидат нарушени. Мора да се запре практиката на газење на правата на луѓето со бугарски идентитет во Македонија. Ние се држиме до неповратноста во целосната и ефективна имплементација на Договорот за пријателство, добрососедство и соработка од 2017 година.

Поддршката за проширување на ЕУ со земјите од Западен Балкан останува приоритет на бугарската надворешна политика и нашата непоколеблива посветеност. Во оваа насока, решени сме да го продолжиме дијалогот со Македонија и фокусирани сме на изнаоѓање прагматични, одржливи и взаемно прифатливи решенија за предизвиците наследени од минатото.

За време на средбите на премиерот Зоран Заев на 17 јуни 2021 година во Софија со претседателот Румен Радев и премиерот Стефан Јанев, како и во разговорите меѓу министрите за надворешни работи Светлан Стоев и Бујар Османи, Македонија изрази подготвеност да ги исполни следниве обврски:

– Скопје што побрзо да потврди до ООН, во согласност со чл. 11 ст. 3 од Договорот за соседство дека краткото и долгото име на земјата се однесуваат само на политичкиот субјект „Република Северна Македонија“, а не на географскиот регион „Северна Македонија“, чиј дел се наоѓа во рамките на суверените граници на Бугарија. По испраќањето на оваа вербална белешка, Бугарија веднаш ќе престане да инсистира на употреба на само долгото име „Република Северна Македонија“ во ЕУ и меѓународните организации;

– Република Северна Македонија конечно да ги повлече своите малцински претензии кон Бугарија, потврдувајќи дека не постојат историски, етнички и други основи за барање статус на малцинство за која било група на луѓе кои не се нејзини граѓани на територијата на Република Бугарија. Ова би било во согласност со клаузулата за немешање во внатрешните работи на Бугарија, утврдена во чл. 11 ст. 5 од договорот од 2017 година;

– Република Северна Македонија да започне процес на рехабилитација на жртвите на југословенскиот комунизам, репресирани на нејзината територија поради нивната бугарска самосвест. Овој историски гест од страна на Република Северна Македонија во пракса би го одразувал нашиот заеднички европски цивилизациски избор;

– Република Северна Македонија да ја прилагоди со Бугарија содржината на нејзините наставни програми со цел објективно да се одразува нашата заедничка историја, поставена како централен елемент во Преамбулата и член 8 ст. 3 од Договорот за соседство, како и со цел елиминирање на образовната содржина што предизвикува омраза кон Бугарија (чл. 11 ст. 6);

– Идентификување, заедно со Бугарија, и отстранување на табли и натписи на територијата на Република Северна Македонија, кои предизвикуваат омраза кон Бугарија и Бугарите.

Софија ја потврдува својата желба да продолжи со истражувачки консултации и сите други потребни форми на билатерални преговори со Скопје. Се приближуваме конструктивно и со добра волја, но очекуваме Македонија да продолжи со практично спроведување на преземените обврски на високо ниво. Нивната точна и непосредна примена ќе биде тест за искреност и добра волја. Ова ќе ни овозможи да се движиме во навистина позитивна насока.

По билатералниот дијалог, министерот за надворешни работи Светлан Стоев денеска испрати писмо до неговиот колега министерот Бујар Османи, во кое изрази очекување за исполнување на преземените обврски од Македонија, како и подготвеност на бугарскиот страна да се најдат трајни и одржливи решенија.

Без оглед на предизвиците, Бугарија и Република Северна Македонија треба да развиваат целосни, искрени, предвидливи и засновани на Договорот за соседство, односи во сите области. Нашата земја даде безброј докази за својата подготвеност за ова.

Ефективната имплементација на Договорот треба да биде еден од критериумите за пристапување во Рамката за преговори за Република Северна Македонија. Ова е внатрешен процес за ЕУ. Во исто време, отворениот пристап што го демонстрираше Република Северна Македонија на оваа тема, вклучително и усвојувањето на критериумите за соседството во рамката за преговори е за поздравување.

Бугарската страна изразува подготвеност за конструктивен дијалог за време на претстојното словенечко претседателство, како и за време на следните Претседателства на Советот на ЕУ, со цел да се постигнат реални и одржливи резултати во процесот на проширување на ЕУ со Западен Балкан, што би несомнено е од полза за целиот регион и неговата европска иднина, се наведува во објавата на бугарското МНР.