Бугарските пратеници денеска по три часа расправа, го изгласаа вчерашниот предлог на надлежната Комисија на бугарскиот парламент и ги замрзнаа цените на струјата и парното со важност од 1 јануари 2022 година до 31 март 2022 година.
Во минатото, зголемените цени предизвикуваа протести во Бугарија, каде што сиромашните домаќинства често се борат да ги платат сметките преку зима.
Бугарскиот независен енергетски регулатор најави зголемување на цените на електричната енергија во просек за 13,5 насто и цените на парното до 30 насто за домаќинствата од 1 јануари, со што ќе се усогласат со цените на пазарот каде компаниите ја купуваат својата енергија.
Парламентот, во кој доминираа пратениците од владејачката коалиција која вети дека ќе ги одржува стабилни цените на електричната енергија во домаќинствата, гласаше за мораториум, спречувајќи го покачувањето на цените на домовите.
Неизвесно е што ќе се случува по 31 март наредната година, но очигледно е дека бугарските граѓани зимата ќе ја поминат со греење по стари сметки. За разлика од македонските граѓани.
