Сите минливи дневни искушенија се решливи со љубов, радост и добрина, порача денеска премиерот Зоран Заев, од Крива Паланка каде присуствуваше на Божествената литургија посветена на Успението на Пресвета Богородица во храмот на манастирот св. Јоаким Осоговски. Тој оттаму упати честитка до сите верници.
-Дозволете ми да им го честитам на сите христијани големиот празник Успение на Пресвета Богородица, празник на љубовта и радоста. Колку и да изгледа чудно што со радост го славиме успението на Богородица во царството Божје, по нејзината смрт, но дотолку повеќе се потврдува дека во димензиите на вечноста овие вредности се исто така вечни. Споделувањето на овие вредности, љубовта и радоста, заедно со добрината не упатува на помислата дека многу често ги забораваме под притисокот на минливите дневни искушенија. Јас сум сигурен дека сите тие стануваат решливи со радост, добрина и љубов, рече премиерот Заев.
Тој порача и дека како добри луѓе, треба да си помагаме, меѓусебно да си пружаме рака и заедно да се надеваме на подобра иднина за сите нас во нашата земја.
