Кога го решивме проблемот со северните соседи, одбраа да ја кренат земјата на нозе, а сега премиерот на С. Македонија ги фали за нивното верно почитување на Договорот од Преспа, ја поздравувам промената на ставот на Мицотакис, но им должи извинување на Грците, рече лидерот на СИРИЗА Алексис Ципрас, говорејќи од Солун на „Thessaloniki Helexpo Forum“, јави дописничката на МИА од Атина.
На почетокот на говорот, Ципрас се осврна на Договорот од Преспа и на ставот што актуелниот грчки премиер го имаше додека беше во опозиција.
-Кога го решивме, како што наметнаа интересите на нашата земја, долгогодишното нерешено прашање со нашите северни соседи со Договорот од Преспа, одбраа да ја кренат земјата на нозе. Денес премиерот на С. Македонија ги фали за верното почитување на договорот од нивна страна. Господинот Мицотакис, не само што се сретнува со него, а велеше дека никогаш нема се сретне, туку и се бори за спроведување на Договорот. Јас ја поздравувам промената на ставот на господинот Мицотакис, бидејќи ѝ служи на националниот интерес, рече Ципрас.
Лидерот на СИРИЗА и поранешен премиер на Грција, кој заедно со Заев ја одиграа клучната улога во постигнувањето на Договорот од Преспа истакна дека Мицотакис им должи извинување на сите Грци „кои ги измами“, односно „извинување што партијата ја стави над татковината и ги наполни Грците со лаги, омраза и поделби“.
