Претседателот на Белорусија Александар Лукашенко нема да биде вклучен во списокот со санкции на ЕУ, главно поради позицијата на Германија, како и на Франција и Италија, објави „Ди Велт“, повикувајќи се на свои извори.
Берлин, Париз и Рим велат дека „и покрај сите околности, каналите за комуникација со Лукашенко треба да бидат отворени“ затоа што, според нив, неговото вклучување во црната листа би значело целосен прекин на дијалогот со Минск. На прво место, балтичките држави и Полска беа за воведување на ограничувачки мерки против белорускиот лидер.
Во средината на август, стана познато дека во врска со протестите во Белорусија, ЕУ разгледува список од 15-20 белоруски функционери на кои ќе им биде забранет влез на територијата на Унијата и пристап до европскиот банкарски систем. Санкции на ЕУ против Белорусија за кршење на човековите права беа во сила од 2004 до 2016 година, а со текот на годините црната листа се прошируваше и се намалуваше. Во септември 2008 година, Европската унија ги замрзна санкциите, но потоа ги продолжи, па дури и ги засили по претседателските избори во републиката во 2010 година.
На неформалниот состанок во Берлин на 27-28 август, министрите за надворешни работи на ЕУ одлучија да ја завршат постапката за санкции кон Белорусија што е можно поскоро.
