Јас не ветувам лесен пат. Но, ветувам борба. И таа борба ќе ја водиме со главата високо, со гордост што сме наследници на асномската идеја за слободна, праведна и солидарна Македонија, порача Венко Филипче, претседател на СДСМ, на собирот на младите социјалдемократи во Струмица, се вели во партиското соопштение што МИА го пренесува интегрално.
Филипче испрати силна порака на мобилизација: „Младите и членовите на СДСМ се тие што во најтешки моменти ја држеа цврсто црвената линија на демократијата. Денес, повторно дојде време за исправување.“
Тој предупреди дека Владата на ВМРО-ДПМНЕ ја турка државата во мрак, во партизација, непотизам и злоупотреби додека граѓаните, особено младите, сè повеќе чувствуваат дека иднината им се одзема.
„Нашата задача е јасна – да ја подигнеме партијата, да ја вратиме надежта, и да им покажеме на луѓето дека СДСМ е силата што знае да ја исправи државата.“ – рече Филипче.
Во таа мисија, потенцираше Филипче, централна улога имаат младите социјалдемократи и ангажираното членство:
„Нивната енергија на терен, во секое маало, во секое семејство, е она што ќе ја разбуди надежта кај разочараните и кај оние што замолкнале. Сега е моментот повторно да се собереме, да се исправиме и да ја изградиме силата што ќе ја запре неправдата и ќе ја врати државата во рацете на народот.“ – заврши тој.
Центар за комуникации со јавноста на СДСМ
Фото: СДСМ
