Со резолуција, за која наскоро ќе се расправа во францускиот Парламент, се бара руската паравоена група „Вагнер“, која е многу активна на украинскиот фронт, да се најде на списокот на терористички организации на Европската унија, јавија француски медиуми.
Необврзувачкиот текст, што пратениците ќе го разгледаат на 9 мај, се однесува на „бројните злоупотреби врз цивилното население“ во Украина извршени од таа група, од кои некои би можеле да се оквалификуваат како „воени злосторства“.
Резолуцијата беше претставена од Бенжамен Хадад од претседателската партија, но се очекува да биде потпишана од другите мнозински групи и пратеници од опозицијата од десницата и левицата. „Станува збор за испраќање политичка и симболична порака, сигнал со кој се осудува Вагнер и нивните активности што се намерно насочени против цивили заради политичка корист, како тероризмот“, рече Хадад.
Во средината на минатиот месец, парламентот на Литванија веќе усвои резолуција во која се наведува дека „Вагнер е терористичка организација“.
