Здравствен систем на Балканот, кој и пред пандемијата беше кревок, е на работ на бездната затоа што нема доволно лекари и болнички кревети за лекување на пациенти заразени со коронавирус, а таа состојба потсетува на хаосот во војните во тој регион во 90-тите години на минатиот век, пишува денеска АФП.

Кошмарот од кој се стравува и колапсот на здравствениот систем почнуваат да стануваат реалност во таа сиромашна област, каде што првиот бран на пандемијата беше потиснат со силни рестриктивни мерки.

Неименуван лекар од БиХ за „Франс прес“ изјави дека се јавува проблем кога е потребна истовремена грижа за неколку пациенти на кои „животот им виси на конец“.

„Ситуацијата ме потсетува на војната и се заканува дека ќе биде полошо во текот на зимата. Можеме да работиме за три лица, но не и за пет “, веле докторот.

Вториот бран на епидемијата е многу посилен отколку пролетниот и така беа откриени пропустите на здравствените системи на Балканот, каде што веќе имаше дефицит од ресурси, лекари, медицински персонал, бидејќи тие заминаа во Западна Европа.

Западен Балкан се соочува со масовна емиграција, особено од добро обучени млади луѓе кои бегаат од невработеност, корупција и ниски плати.

Од почетокот на епидемиолошката криза во март, регистрирани се скоро 10.000 смртни случаи, од кои скоро половина во последниот месец.

Според АФП, Босна и Херцеговина, Македонија и Црна Гора се меѓу првите десет земји во Европа според смртноста во споредено со бројот на жители.

Поради економската состојба, балканските земји сега не сакаат да воведат драстични мерки и повеќе се одлучуваат на временските ограничувања на рестораните и баровите.

Дури и пред пандемијата на коронавирусите, Балканот имаше една од најниските стапки на лекари во Европа, според Светската здравствена организација. Сега медицинските работници дополнително се намалија бидејќи лекарите и медицинскиот персонал се заразија со коронавирусот.

Во Србија, околу 2.000 од нив мораа да одат во самоизолација, бидејќи болниците се преоптоварени. Белград веќе нема на располагање болнички кревети, а властите брзаат да изградат два нови објекти.

Косово, каде што недостатокот на лекари ги принуди жителите да се преселат во соседните земји дури и пред кризата, размислува да ги претвори старите хотели во импровизирани болници.

Во соседна Албанија, најмалку 300 побогати пациенти заминале на лекување во странство, пред се во Турција.

Владата на Македонија, од своја страна, побара помош од приватните болници затоа што јавните здравствени установи се преоптоварени.

Хрватските лекари, исто така, предупредуваат на недостаток на персонал и опрема, во писмото потпишано од шест професионални организации.

Властите во регионот се  соочуваат со итна здравствена состојба и потреба да ја заштитат кревката економија, пренесува АФП.

„Ние сме премногу сиромашни за да ги повториме сите ограничувања двапати“, вели хрватскиот економист Љубо Јурчиќ. Во Босна, скоро сè остана отворено, продавници, кина или спортски сали, бидејќи земјата не може да финансира мерки за помош на компании или нивни вработени, додава француската агенција.