Поранешниот помошник  за јавни набавки на министерот во МВР, Ѓоко Поповски, по 9 години поминати во затвор доби делумно полмилување од една година. Одлуката за делумно помилување е потпишана од македонската претседателка, Гордана Сиљановска Давкова и излегува на слобода.

Поповски беше осуден во предметите „Триста“ и „Тенк“ на Специјалното јавно обвинителство (СЈО). Во одлуката за помилување се наведува дека се делумно ослободува од понатамошно извршување на неиздржаниот дел од затворската казна.

Еден од симболите на случајот „Тенк“ — „мерцедесот“, за кој Поповски беше осуден, сè уште е во сопственост на Службата за општи и заеднички работи при Владата. Претходната влада предводена од СДСМ најавуваше продажба на возилото, со образложение дека е луксузно и скапо за одржување, но тоа не беше реализирано, напротив таа го користеше за намената за кое беше купено возилото.

Во Одлуката што беше објавена денес во Службен весник, и за која Сиљановска не испрати соопштение за јавноста, се помилувани осум лица, од кои четири целосно, а четири од делумно извршување на казната.

Ова доаѓа откако во 2020 годинаАпелациониот суд Скопје му ја намали од 9 на 5 години затворската казна на поранешниот шеф на набавки Ѓоко Поповски од МВР за набавка на 300 возила за полицијата во време на министерувањето на Гордана Јанкулоска.

Казната на Поповски му е намалена речиси двојно од таа што му ја изрече судијката Добрила Кацарска. Дадена му е најмалата од таа што е предвидена за злоупотреба на службената положба и овластувањата преку јавна набавка со која го оштетил буџетот со 454.000 евра. Поповски доби големо намалување на затворската казна изречена во Основниот кривичен суд Скопје, и покрај тоа што е правосилно осуден на 4,5 години затвор за незаконска набавка на луксузниот мерцедес за Никола Груевски со пари од полицијата.

Со оваа одлука на Апелација, и пресудата за предметот “Триста” стана правосилна, па Поповски место 4,5 плус 9, ќе лежи во Идризово 4,5 плус 5 години, вкупно 9,5 години затвор. Бидејќи одлежа девет години, со ова помилување тој излегува на слобода, објавија повеќе медиуми, иако не е јасно зошто тогаш неговото помилување е во групата на „делумно помилувани лица“. Оваа недоумица веројатно ќе се расчисти во текот на утрешниот ден. .