Интензивни дождови вчера го погодија североисточниот дел на Шпанија, вклучувајќи ја и Каталонија, каде што железничкиот сообраќај беше целосно прекинат неколку часа, а властите пријавија и поплави.
Според метеоролошката агенција „Аемет“, која вчера попладне стави голем дел од Каталонија во црвена тревога, во некои области наврнале повеќе од 100 литри дожд на метар квадратен за неколку часа.
Обилните дождови предизвикаа поплави, меѓу другото, и во болница во Барселона, која мораше да одбие прием на нови пациенти по прекин на електричната енергија.
На аеродромот во Барселона, авион што полета за САД мораше да се врати откако неговиот нос беше оштетен од град, според контролорите на летање.
Опасното време ја принуди железничката компанија „Ренфе“ да го прекине железничкиот сообраќај низ цела Каталонија неколку часа, вклучувајќи ги брзите, регионалните и приградските возови.
Во тој регион, повеќе од 70 луѓе побараа помош од итните служби, но никој не беше во потешка состојба, соопштија итните служби. Црвената тревога, која беше активирана околу 17:00 часот, беше укината два часа подоцна.
Покрај Каталонија, неколку региони на северот и истокот на Шпанија, исто така, беа погодени од силни дождови, вклучувајќи ги Арагон и областа Валенсија.
Фото ЕПА
