Германија е подготвена за руските санкции во енергетскиот сектор што вчера ги објави Кремљ, изјави германскиот министер за економија, Роберт Хабек пред Долниот дом на германскиот Парламент (Бундестаг).
– Пазарот ќе обезбеди алтернативни извори на енергија за да го надомести секој недостаток предизвикан од помалите испораки на гас од Русија, истакна Хабек.
Тој додаде дека проширувањето на обновливите извори на енергија сега е предуслов за идната безбедност на Германија.
Русија синоќа најави санкции против 31 западна компанија, меѓу кои и енергетската компанија „Газпром Германија“, која од почетокот на април е под раководство на Федералната агенција за мрежен транспорт.
Москва воведе санкции против компании од Европската унија, САД и Сингапур, како одговор на санкциите што и беа наметнати од Западот поради воената инвазија на Украина.
На списокот има 31 компанија, од кои повеќето припаѓаат на „Газпром Германија“, германска филијала на рускиот гигант.
