Албанската полиција вечерва употреби водени топови против десетиците илјади студенти кои демонстрираа во главниот град, каде што веќе втор ден се одржуваат насилни демонстрации.
Студентите запалија владина зграда и две банки и фрлаа камења кон полицијата во знак на протест поради зголемувањето на трошоците за образование и корупцијата. Полицијата одговори со водени топови и солзавец за да ги растера демонстрантите.
Демонстрантите предизвикаа пожар во зградата на Министерството за образование, превртеа контејнери за ѓубре и ги скршија прозорците на локалните продавници и бизниси. Филијала на Рајфајзен банка во близина на Министерството за образование, исто така, е запалена, објавува британскиот Гардијан.
Ова се најнасилните протести досега против премиерот Еди Рама, кој во мај минатата година го освои четвртиот мандат на функцијата, но сега се соочува со растечко незадоволство и перцепција за корупција кај водечките функционери. Демонстрантите, исто така, ги отфрлија опозициските личности како неприфатлива алтернатива.
Немирите избувнаа по летото мирни протести против Рама, поттикнати од предложениот проект за развој на луксузно одморалиште долж јужниот брег на Албанија, финансиран од зетот на американскиот претседател Доналд Трамп, Џаред Кушнер.
Студентските организатори изјавија дека протестите се предизвикани од условите на универзитетот, трошоците за високо образование и недостатокот на финансиска поддршка и перспективи за работа по дипломирањето.
Немирите се дел од поширок бран студентски активизам што ја зафати Европа околу образованието и условите за живот, пишува „Гардијан“.
Албанските медиуми објавија дека денешните протести се проширија и на универзитетите во Елбасан и Скадар.
Владата го осуди насилството.
Синоќешните протести, исто така, станаа насилни, кога демонстрантите кршеа излози на продавници и демолираа канти за ѓубре, а полицијата употреби солзавец за да ги растера. Полицијата објави дека вчера биле приведени 23 лица, а дека шест полицајци и еден новинар биле повредени.
