Осудениот за убиството на Мартин Нешкоски, поранешниот полицаец Игор Спасов бил пронајден по пријава за насилство од жената со која живеел во стан во софиското предградие „Младост“ – велат од МВР ден по апсењето на Спасов.
Идентитетот на бегалецот бил утврден за време на увидот од бугарската полиција која утврдила дека тој бил баран од Интерпол, но и дека Спасов по кој се трагаше повеќе од една година, неодамна влегол во Бугарија од Турција.
Според постапката, македонските власти сега треба да поднесат барање за екстрадиција во законските рокови. Сепак, за тој да биде донесен во Македонија, потребно е да се комплетира целосната документација, меѓу кои е и правосилната судска пресуда, налог за упатување на издржување казна затвор, како и наредба за издавање меѓународна потерница. Од бугарското министерство за правда за Канал 5 велат дека брзината на екстрадицијата е во рацете на надлежните во земјава кои треба да ја поднесат документацијата, нешто за што од македонското министерство велат дека е во тек.
-До Министерството за правда утрово пристигна известување од Министерството за внатрешни работи дека лицето Игор Спасов е приведено во Софија. Министерството за правда, по прибирањето на сите потребни документи, во предвидениот рок ќе достави до бугарските власти барање за екстрадиција на Игор Спасов назад во земјава, истакнале од Министерство за правда.
Спасов беше осуден за убиството на Мартин Нешкоски за време на прославата во Скопје за изборната победа на ВМРО-ДПМНЕ во 2011 година. За делото доби казна затвор од 14 години, а по него се трага од октомври 2019 година кога не се врати во затворот Идризово на до извршување на казната, откако претходно беше пуштен од затворот поради здравствени причини и потреба од операции.
