Премиерот Зоран Заев денеска присуствуваше на почетокот на изградбата на нов станбено деловен објект Гарден Ресиденс Ин во Скопје, чиј инвеститор е поранешниот политичар и бизнисмен Имер Селмани.
Како што соопшти владината прес-служба, станува збор за домашна инвестиција од 10 милиони евра, објект кој ќе се простира на површина од 22.000 м2 и кој ќе понуди нови современи услови за домување.
Премиерот Заев ја поздрави оваа храбра одлука за инвестиција во капитален проект којшто ќе го краси Скопје и ќе донесе трајни придобивки за граѓаните.
– Мене ми е многу драго што општественици луѓе, инвеститори го доловиле моментот дека претстои убава иднина на нашата Македонија, а тоа секако нашите граѓани ќе го верификуваат на претстојниот референдум, рече Заев.
Зборувајќи за амбиентот за инвестирање, којшто се создава по поканата за членство во НАТО и започнатиот процес за преговори со ЕУ, премиерот Заев, како што се посочува во соопштението, ја нагласи позицијата којашто Македонија ја добива како стабилна и пријатна дестинација за многу нови инвестиции и домашни и странски.
– Државата преку капиталните инвестиции ќе помогне во изградбата на улиците, топловодните мрежи, водоводните и канализационите мрежи и до оваа локација и за Скопје и за цела Македонија. Ние ќе продолжиме по тој пат да бидеме ваша поддршка. Почетокот на овој проект е доказ на добра соработка во полза на инвеститорите, помеѓу Владата, помеѓу општина Ѓорче Петров и градот Скопје. Ние сме тука да ви служиме и да бидеме ваш сервис, бидејќи придобивките остануваат за граѓаните на Република Македонија, потенцираше Заев.
По повод започнувањето со изградба на овој капитален објект свои обраќања на настанот имаа градоначалниците на општина Ѓорче Петров и град Скопје, Александар Наумовски и Петре Шилегов кои порачаа дека општините ги поддржуваат приватните инвестиции преку квалитетни услуги и дека со реализацијата на овој проект започнува исполнувањето на една нова визија за Скопје.
Инвеститорот и сопственик на БисОил, Имер Селмани рече дека оваа капитална инвестиција преку квалитетна градба, ќе понуди еден нов концепт на урбано и модерно домување оплеменет со зелени површини што ќе претставува нов стил на живеење за нашите граѓани според нови модерни европски стандарди.
– Ова е наш мал придонес како инвеститори да ја донесеме Европа овде кај нас. Од вас очекуваме да не понесете во Европската Унија, во големото семејство на вредности и ваквите проекти да гледаме во секој дел од нашата преубава Република Македонија, порача инвеститорот Селмани, се наведува во соопштението.
