Ирачките власти донесоа одлука за повторно отворање на граничниот премин Јамима со Саудиска Арабија, откако овој премин беше затворен пред 30 години, во 1991 година, веднаш по втората Заливска војна.
„Отворањето на граничниот премин Јамима беше прифатено откако саудиската страна се согласи да ја отвори својата страна на терминалот и да ја подготви целата инфраструктура“, се наведува во соопштението на Ирачката погранична служба, пренесе агенцијата Анадолија.
Во соопштението не се споменува конкретен датум за повторно отворање на граничниот премин.
Граничниот премин Јамима, користен од патници, аџии и трговци кои патуваа меѓу двете земји богати со нафта, беше затворен во 1991 година по војна во Заливот.
Ирак и Саудиска Арабија ги обновија своите дипломатски односи во 2015 година, што беа прекинати по ирачката инвазија на Кувајт во 1990 година.
