Поранешниот италијански премиер Силвио Берлускони (86) одлучи да не се кандидира за претседател на Италија.
– Одлучив да направам уште еден чекор на патот кон националната одговорност, барајќи од оние што ме предложија да се откажат од наведувањето на моето име за Претседателството на Републиката, изјави Берлускони.
Италијанскиот парламент утре ќе го почне гласањето за нов шеф на државата кој ќе го замени претседателот во заминување Серџо Матарела.
За кандидатот да победи на тајното парламентарно гласање му треба двотретинско мнозинство во кој било од првите три круга на гласање. Потоа е доволно апсолутно мнозинство.
Изборот на нов претседател на Италија би можел да има големи последици за иднината на Владата на премиерот Марио Драги, кој се обидува да го спречи бранот зараза со Ковид-19.
Драги јасно стави до знаење дека би сакал да стане претседател, со што ќе заврши неговата 11-месечна влада.
Тоа значи дека ќе треба да се именува нов премиер или да се одржат избори една година пред рокот.
Сепак, нема гаранција дека 74-годишниот поранешен шеф на Европската централна банка ќе ја добие работата.
Други кандидати се поранешниот претседател на парламентот Пјер Фердинандо Касини, поранешниот премиер Џулијано Амато и сегашната министерка за правда Марта Картабија.
Претседателот, кој се избира со седумгодишен мандат, генерално има церемонијална улога, но има широки овластувања по изборите или кога владата паѓа.
Тој го има последниот збор кога го назначува премиерот и другите членови на владата.
