Планинар кој случајно минувал низ парк-шумата Водно ги известил активистите од иницијативата „Го сакам Водно“ и кажал дека се ископани околу 500 метри. Оттаму истакнуваат дека се особено револтирани поради одлуката да се продолжи со копање, посебно за време на државен празник.
Забелешките, кои претходно се дадени до надлежните институции сѐ уште не се отстранети, тврдат од иницијативата, бидејќи, просторот каде се вршат градежни работи се уште не е обележан.
Иако беа запрени со привремена одлука поради нерегуларности поврзани со обележување на теренот каде се копа, но и поради дозволите кои АД Македонски енергетски ресурси (МЕР) требаше да ги обезбеди, градежните активности на Водно продолжија вчера.
Денеска активистите на „Го сакам Водно“, во фејсбук соопштување, а во врска со соопштението на МЕР АД Скопје вчера, велат дека согласност не е постигната, ниту пак тие се дел од работните групи за мониторинг на изведбата на целиот проект. Тие го демантираат официјалното соопштение и ведат дека ширењето лажни вести е лажна вест од страна на портпаролот на Владата на Република Македонија, Миле Бошњаковски и директорот на Македонски енергетски ресурси, Бајрам Реџепи.
