Според календарот на МПЦ (Јулијанскиот календар) денеска е 31 март.
Денеска е Св. Ипатиј Гангрски.
Роден е во Киликија, а бил епископ во градот Гангра. Учествуваше на Првиот Вселенски Собор. На сите страни бил прочуен заради благочестивиот живот и дарот на чудотворство. Царот Констанциј нареди да се изобрази ликот на Ипатиј уште за време на животот на овој светител и тој лик царот го држеше во својот дворец како оружје против секаква непријателска сила. Враќајќи се еднаш од Цариград Ипатиј беше нападнат во еден теснец од еретиците новатијани и турнат од друмот во некоја кал. При ова една жена од таа дружина го удри со камен во главата и вака светителот го заврши својот земен живот. Но, жената одеднаш полуде и го зеде истиот оној камен и со него се удираше самата себеси. Кога ја доведоа на гробот на Свети Ипатиј и Му се помолија на Бога за неа, по големата милосрдност на Свети Ипатиј, таа се исцели и остатокот од животот го помина во покајание и молитва. Свети Ипатиј пострада и се пресели во Царството на Христос во 326 година.
ОД КАТОЛИЧКИОТ КАЛЕНДАР: Денеска е Мартин Први.
Тој со црквата Господова управувал од 649 до 656 година. Бил роден во Умбрија. Во 649 година бил избран за папа и го повикал соборот на кој бил осуден монотелитизмот (погрешното учење кое вели дека во Христос е само една волја). На соборот, во исповедувањето на верата и во дваесетте канони било развиено учењето за две волји во Исус Христос, божествената и човечката. Под влијание на кривоверците во 653 година, царот Константин го одвел свети Мартин во Цариград. Поради големите измачувања тој умрел во 656 година. Свети Мартин го прославува и Католичката и православната црква.
ОД ИСЛАМСКИОТ КАЛЕНДАР: Времето за ифтар и суфур
Во Скопје, времето за ифтар (кога завршува постот), денеска е во 19:19 часот, додека времето за суфур (кога почнува постот) е во 4 часот и 12 минута. Времето за ифтарот и суфурот во Прилеп и Куманово почнува една минута порано, во Велес две минути порано, Штип три минути, во Кочани четири минути, во Струмица и Валандово пет минути, а во Делчево шест минути порано. За разлика од времето за ифтарот и суфурот во Скопје, во Ресен и Битола ифтарот и суфурот почнуваат една минута подоцна, во Тетово, Гостивар и Кичево две минути, а во Охрид, Дебар и Струга пет минути подоцна.
