По поплавите што вчера ја зафатија БиХ, најтешка е состојбата во општина Јабланица, каде што најголем број урнати згради и објекти се под вода, а истото е и во Трусина и Бутуровиќ Поље, јави телевизијата БХТ1.

Новинарка на телевизијата, која известува од терен, изјави дека овие места се непрепознатливи.

-Можеме да видиме само дрвја и вода, кал, се’ лебди на површината на водата, можеме да видиме загрижени жители, изјави таа и додаде дека веќе се започнати хуманитарни акции за помош на загрозените.

Според последните неофицијални податоци само на територијата на Јабланица како исчезнати се водат 48 лица, додека официјалните податоци велат дека по поројните поплави и свлечиштата кај Јабланица, Кониќ, Крешево и Кисељак, потврдена е смртта на 19 лица, а дека по многу други се уште се трага.

Населението во погодените подрачја има потреба од итна помош, а најитни се конзервираната храна и вода во шишиња.

Патната комуникација е отежната, а на места и целосно прекината.

Спасувачи утринава ја започнаа потрагата по исчезнати во селото Доња Јабланица, во северниот дел на Херцеговина, кое е затрупано од огромните наноси од камења, песок и кал во катастрофалните поплави што вчера ја погодија Босна и Херцеговина.

Припадници на Цивилната заштита, пожарникари, планинарската спасувачка служба и други служби се обидуваат да стигнат до куќите за кои се стравува дека го кријат најголемиот број исчезнати во поплавите и свлечиштата што синоќа ги погодија општините Јабланица и Коњиќ и неколку други централни босански општините.

Градоначалникот на Јабланица, Дамир Шабановиќ, вели дека се распоредени голем број спасувачи и градежни машини.

-Вложуваме максимални напори да им помогнеме на сите, да спасиме луѓе и предмети, рече тој.

Според последните податоци, пронајдени се 16 тела на жртвите, додека медиумите јавуваат и за 17-то пронајдено тело на подрачјето на Јабланица во поплавите и одроните од карпи. Во Долна Јабланица официјално за исчезнати се пријавени 12 лица, додека медиумите јавуваат дека има повеќе десетици случаи.

Едно лице загина во Бутуровиќ Поле, во општина Коњиќ, а се трага по уште четири лица. Тројца удавени лица се пронајдени во Фојница, во централна Босна.

Сообраќајот на главниот автопат кон Мостар се уште е во прекин, бидејќи дел од патот пропадна во реката Неретва. Во оваа општина и соседниот Коњиќ има голем број населени места кои се уште се отсечени од светот.

Материјалната штета е огромна, а помош за Босна и Херцеговина најавија и Европската Унија и соседните Република Хрватска и Србија, како и бројни други земји.

За лицата од загрозените подрачја се организира сместување во Спортската сала во Јабланица и во Центарот за бегалци Салаковац кај Мостар. Обезбедени се 80 легла во Јабланица и 120 во бегалскиот центар.

фото:ЕПА