Како што поминува времето, толку повеќе ќе бидат очигледни економските придобивки за Грција, особено за нашата Македонија, вели грчкиот министер за надворешни работи, Јоргос Катругалос.
– Договорот од Преспа е чесен компромис, ги задоволува националните интереси на двете страни и еднаш засекогаш го отстранува отровот на меѓусебното сомневање, вели Катругалос во интервју за неделното издание на грчкиот весник „Етнос“, јави МИА од Атина.
На прашањето дали до изборите, владата ќе успее да ги убеди сите оние кои ја критикуваат владата за придобивките од договорот, Катругалос вели дека „не се сомнева во тоа“.
-Полека, полека се сфаќа значењето на договорот како чесен компромис што ја задоволува суштината на националните интереси на двете страни, отстранувајќи го еднаш засекогаш отровот на меѓусебното сомневање. И како што поминува времето, толку повеќе ќе бидат очигледни економските придобивки за земјата, а особено за нашата Македонија, од нашето протагонистичко преместување на економското поле на Балканот, вели шефот на грчката дипломатија.
Во однос на комисиите за учебниците и за трговските ознаки, министерот за надворешни работи на Грција објаснува дека првата е веќе формирана и „од септември, ќе бидат пуштени нови учебници во Македонија ослободени од секаков вид иредентизам“.
-Комисијата за ознаки ќе се формира до средината на мај со учество на претставници од надлежните министерства за надворешни работи, за економија и развој, за земјоделски развој, како и меѓународни експерти. Со цел да се подготви, беа направени систематски консултации со бизнисмените и коморите од Северна Грција и со други, објаснува Катругалос во интервјуто за „Етнос“.
