Климатските промени доведоа до двојно поголема веројатност за појава на обилни дождови како оние што предизвикаа разорни поплави во централна Европа овој месец, се наведува во извештај во кој авторите ги повикуваат политичарите да дејствуваат за да се запре глобалното затоплување.
Во најлошата поплава што ја погоди Централна Европа во најмалку две децении, 24 луѓе загинаа, оштетени беа згради, се урнаа мостови, а штетата се проценува на милијарди долари.
Извештајот на World Weather Attribution, меѓународна група на научници што ги проучува ефектите на климатските промени врз екстремните временски услови, открива дека четирите денови на врнежи што ги донела бурата Борис биле најобилните досега регистрирани во централна Европа.
Се вели дека климатските промени ги направиле таквите дождови најмалку двојно поверојатни и седум проценти пообилни.
– Овие поплави ги истакнуваат катастрофалните резултати од затоплувањето предизвикано од фосилни горива. Сè додека нафтата, гасот и јагленот не се заменат со обновливи извори на енергија, бурите како Борис ќе предизвикуваат уште пообилни врнежи, предизвикувајќи поплави кои ја уништуваат економијата, рече Џојс Кимутаи, коавторка на студијата и истражувач на Институтот Грантам на Империал колеџ во Лондон.
Иако комбинацијата на временските обрасци на бурата Борис – студениот воздух на Алпите и многу топол воздух над Медитеранот и Црното Море – е невообичаена, извештајот покажува дека климатските промени ги направиле таквите бури поинтензивни и поверојатни.
Според извештајот, се очекува ваква бура да се случува во просек еднаш на секои 100 до 300 години во денешната клима, која е за 1,3 степени Целзиусови потопла од прединдустриската ера.
Сепак, се вели дека таквите бури ќе резултираат со најмалку 5 проценти повеќе дожд и ќе се појават околу 50 проценти почесто отколку сега, ако затоплувањето од прединдустриското време достигне 2 степени Целзиусови, што се очекува во 2050-тите.
Фото: ЕПА
