САД сакаат дијалогот меѓу Белград и Приштина да доведе до траен договор кој ќе ги задоволува двата народи и доколку Приштина и Белград се согласат да разговараат за мали измени во разграничувањето, ние нема да се спротивставиме на тоа, порача американскиот амбасадор во Косово, Филип Коснет.
Коснет за весникот „Газета експрес“ изјави дека САД сакаат овој процес да доведе до траен договор што ги задоволува двата народа, не само политичките лидери, а за тоа ќе биде потребно време. Тој верува дека ова е можно во 2020 година и додаде дека сегашната американска администрација е посветена на поддршката на овој процес.
-Ние сме посветени на мирот, правдата и просперитетот за сите на Балканот, а нашите пријатели од Европската унија исто така се вклучени во овој процес. Не мислам дека одложувањето на дијалогот ќе биде од корист за Косово, бидејќи тоа не и помогна на економијата на земјата. А имаме проблем со повлекувањата на признанавањата, рече Коснет.
Коментирајќи ја изјавата на Албин Курти дека како премиер ќе ги води разговорите во дијалогот Приштина-Белград и дека не го сака присуството на Хашим Тачи во тие разговори, Коснет верува дека Курти, како премиер, ќе изгради професионален и конструктивен однос со Тачи.
Коснет рече дека досегашните преговори меѓу српскиот претседател Александар Вучиќ и Тачи не треба да се игнорираат и отфрлат.
-Ако водеа плодни дискусии и постигнаа напредок за некои прашања, косовската влада треба да ги разгледа и да ги процени пред да започнат со преговори. Исто така, важно е Владата да ги земе предвид ставовите на сите косовски граѓани. Не само на политичките партии, туку и на граѓанското општество, организациите и обичните граѓани, оцени Коснет.
Тој е убеден дека и покрај негативниот став, Косово треба да биде активен учесник во најновата иницијатива за „мини-Шенген“, затоа што, само со заеднички напори на сите на Западен Балкан, можно е да се создаде регионална економија и мир. об/
2019-12-05 13:33:29, од Златко Шумковски
