Министерот за надворешни работи на Косово Беџет Пацоли денеска свечено го презентира преземањето на претседателствувањето на неговата земја со Процесот на соработка на Југоисточна Европа (СЕЕЦП) во наредната година, јави МИА од Приштина.
Пацоли на прес-конференција по тој повод изјави дека приоритет на Приштина за време на претседателствувањето ќе биде задржувањето на младите во земјата, промоцијата на културата и развојот на туризмот.
Покрај Косово, членки на СЕЕЦП се Македонија, Албанија, Црна Гора, Босна и Херцеговина, Хрватска, Словенија, Србија, Бугарија, Турција, Грција, Романија и Молдавија, а претседателствувањето од страна на една земја трае една година.
Претходно со Процесот претседаваше Босна и Херцеговина, чиј самит, одржан порано овој месец, го бојкотираа косовскиот претседател Хашим Тачи и шефот на дипломатијата Пацоли¸поради нерамноправен третман на нивната земја од страна на домаќинот.
