Премиерот Димитар Ковачевски денеска, од обраќањето во Стопанската комора по повод Националниот ден на осигурувањето, 1 Ноември, уште еднаш порача дека Македонија заслужува да биде дел од ЕУ.
Како што истакна Ковачевски, европската иднина е пред нас.
-Развивањето на свеста за обезбедување сигурност преку договорите за осигурување е дел и од политиката на ЕУ. Во таа насока, секоја заложба во овој правец е со цел обезбедување економска стабилност, сигурност и благосостојба на граѓаните и компаниите. Европската иднина е пред нас и преку оваа индустрија. Тоа пред два дена јасно и гласно ни го порача претседателката на Европската комисија, која при нејзината посета порача дека ние заслужуваме да станеме дел од Европската Унија. Затоа, уште еднаш од овде сакам да порачам дека членството во ЕУ се базира на концептот на заслуги. С. Македонија заслужува да биде дел од ЕУ, а сите ние заслужуваме да бидеме европски граѓани, овде дома тука во нашата држава. Да живееме европски и да се однесуваме европски. Нашите млади луѓе, нашите деца и сите наши граѓани го очекуваат тоа од нас, истакна премиерот Ковачевски.
Европската иднина, повтори, мора да се обезбеди, пред сè за младите.
фото: МИА архива и Влада на РСМ
