Ако сакаме Македонците да имаат иднина, ако сакаме нашата земја да стане модерна, ако сакаме нашите граѓани да не останат гладни или смрзнати, тогаш ние мора да се поврземе со Европа, рече премиерот и претседател на СДСМ Димитар Ковачевски на партиската трибина во Кавадарци.
Тој изутрина киниса од Скопје за Битола како премиер на јубилејната прослава на РЕК Битола, а попатно на враќање ја искористи приликата за партиски активности и промоција на СДСМ во Кавадарци.
– Поврзувањето со Европа, во денешни услови не е само прашање на удобност, на европски вредности, на реформи, пред сѐ е прашање на преживување. Големината на СДСМ се државотворните одлуки за нашата татковина, политиките за својот народ и сите граѓани. Тоа сме ние, тоа не одредува нас и тоа е значењето на овие четири букви. 31 година СДСМ е на вистинската страна на историјата. Така било, така и ќе биде, СДСМ е тука за граѓаните, за државата, СДСМ е тука за сегашноста, но и за иднината, нагласи Ковачевски.
Тој додаде дека патот кон ЕУ нема да биде лесен и ги повика сите да се вклучат во остварување на оваа цел, но, потенцира, големата награда е на крајот на тој пат.
-Нашиот народ да биде горд, со заштитено национално достоинство, со заштитен македонски идентитет, рамноправен со другите народи на ЕУ и побогат, вели Ковачевски.
Тој се осврна на последниот пакет мерки со кои се поддржани 200 илјади граѓани, што е вели, доказ за видлива грижа.
-За овие 10 месеци откако ја предводам Владата одвоивме над 760 милиони евра за два пакета мерки за помош на граѓаните и компаниите. Во споредба со земјите од регионот имаме најголем пакет на антикризни мерки, 5 отсто од БДП. Ова го потврди и Светска банка. Тоа значи дека 200.000 граѓани поддржуваме само со последниот пакет антикризни мерки, рече Ковачевски.
Тој додаде дека Владата уште од самиот старт покажа дека е посветена кон подобрување на животниот стандард на граѓаните и во првите сто дена од мандатот ја зголеми минималната плата на 18 илјади денари.
-Пензиите за шест месеци ги зголемивме за 10 отсто, со новата методологија што значи во март 2023 година ќе има ново покачување. Во календарска година пензиите да се зголемат за 16 отсто досега се нема случено, подвлече Ковачевски.
Владата, порача тој, продолжува да ја субвенционира струјата за околу 600 илјади домаќинства и 72 илјади компании.
-Претходно, во време на пандемијата, без заменик министер за финансии и горд сум што учесвував во подготовката на неколку пакет мерки со кои обезбедивме помош и поддршка од 1,2 милијарди евра. Вкупно, тоа се две милијарди евра диретна помош кон граѓаните и стопанството за 3 години, рече Ковачевски.
