Најдобар начин да се оддаде почит на безвременското просветителско дело на патронот на македонската култура свети Климент Охридски е да се продолжи неговата мисија, а тоа е направено со успехот да се издигне македонскиот јазик на рамниште со јазиците во светот, а Македонската православна црква да биде еднаква со сите канонски православни цркви, истакна премиерот Димитар Ковачевски.

На свеченоста „Св. Климент Охридски – извор на нашата духовност и образование“, која се одржа во Националната и универзитетска библиотека што го носи токму името на просветителот, ученик на браќата Кирил и Методиј и прв словенски епископ, претседателот на Владата рече дека македонскиот јазик досега признат во културата и науката, денес е и политичка реалност во Европа и во светот, рамноправен со јазиците кои се во службена употреба во ОН, НАТО и ЕУ.

-Ова значи дека македонскиот јазик е еден од официјалните јазици во светот. Минатата година успеавме на македонски јазик да биде потпишан првиот меѓународен договор со Европската Унија, а истовремено почна преведувањето на севкупното европско законодавство на македонски јазик. Со тоа првпат, во многувековните заложби за негов рамноправен третман, го поставивме македонскиот јазик на рамноправно рамниште со јазиците на 27-те земји членки на ЕУ… Денес и Македонската православна црква, како наследничка на древната Охридска архиепископија, се впишува како автокефална, еднаква со другите сестрински цркви, еднаква со сите канонски православни цркви во светот, рече Ковачевски во обраќањето.

Ја нагласи упорноста на свети Климент, кој и во тешки времиња и прогонства, рече, не се откажал од намерата и светата цел во која имал силна верба – за просветување на Словените на македонска почва, „издигнувајќи се во една од најзначајните личности за македонската писменост и меѓу првенците на европската обединувачка идеја“.

-Свети Климент Охридски добива значајно место и во европскиот цивилизациски развој, како мисионер за духовно и културно обединување на народите. Ракописи од Охридската школа денес се наоѓаат речиси во сите значајни светски библиотеки и установи… Уште пред повеќе од 1100 години, благодарение на свети Климент, Охрид се издига во значајна образовна, културна и духовна европска престолнина од каде се шират писменоста и цивилизациските вредности, истакна Ковачевски.

Потенцирајќи го огромното значење на св. Климент Охридски во најширока смисла, тој порача дека моќта и улогата на еден народ не зависат од неговата големина, бројноста или од големината на неговата територија, туку од „способноста да остане цврст во визионерските потфати, дури и кога тие на прв поглед изгледаат невозможно“.

-Денес Република Северна Македонија успеа со храбри и мудри одлуки, помогнато од наследениот обединувачки дух, да се консолидира на домашен план. Решивме предизвици кои со децении како карпа ни стоеја на патот на напредокот. Затоа денес на нас се гледа како на посакувана членка и во Европската Унија, фактор на стабилноста во регионот, и во европски контекст. Мора да се интегрираме и во Европската Унија затоа што  ние како Македонци и сите граѓани на Република Северна Македонија носиме суштински, демократски, цивилизациски вредности, како што е обединувањето на различностите. И, едноставно, ги заслужуваме европските интеграции, порача претседателот на Владата.

Како што рече, „перфидно и штетно е граѓаните да се збунуваат со лажни заплашувања во однос на македонскиот идентитет, којшто никој никогаш, низ вековите – не успеал, ниту некогаш ќе успее да го побие“.

-Убеден сум дека ваквите обиди се веќе препознаени од мнозинството граѓани и многу скоро, но и засекогаш, ќе се најдат на буништето на штетниот и опасен лажен патриотизам, додаде Ковачевски.

Во својот говор тој се осврна и на заложбите на Владата за грижа и заштита на  македонскиот јазик и култура – лани се реконструирани кубуси на покривиот на НУБ која, рече тој, во својот фонд има над три милиони библиотечни единици, чии корени досегаат до делото на сесловенските просветители Кирил и Методиј.

-Со буџетски средства, во Институтот за македонски јазик овозможивме трајна заштита на околу пет милиони записи со стари македонски текстови, како дел од нашето духовно богатство, а некои од нив датираат дури и од 14 век. Започнавме со формирање Центар за промоција на македонскиот јазик во село Љубојно. Поддржавме дигитализиран Толковен речник на македонскиот јазик и Правопис на македонскиот јазик во дигитална форма. А меѓу низата активности за заштитата на македонскиот јазик е и поддршката на донесувањето нов Закон за употребата на македонскиот јазик, нагласи Ковачевски.

На свеченоста во НУБ за животот и творештвото ан свети Климент се осврна проф. д-р Димитар Пандев, кој рече да не бил св. Климент и неговата Охридска книжевна школа, ништо не ќе останело ниту од споменот за светите браќа Кирил и Методиј и нивната просветителска мисија и борбата со тријазичниците и тој, рече, „би останал затскриен во некое римско или византиско или германско ковчеже“.

Отец Милан Ѓорѓевиќ од МПЦ-ОА  истакнувајќи дека денешното празнување е исклучително важно, ги цитираше зборовите на архиепископот охридски и македонски г.г. Стефан дека „на св. Климент не му требаат нашите пофалби, туку нам, како народ и како црква, ни требаат пофалбите на св. Климент“.

-Не е доволно да се фалиме со свети Климент, туку да го почитуваме и славиме и, пред се, да го следиме неговиот пример. Зашто тој и по 11 столетија останува мерило за вистинските вредности, рече отецот пренесувајќи ги зборовите на поглаварот на МПЦ-ОА.

Чествувањето на свети Климент Охридски почна со положување цвеќе пред неговиот споменик на платото на НУБ од делегации на Владата, Армијата, од институции, установи што го носат неговото име, претставници на меѓународната заедница, политички партии…

Денот по повод свети Климент Охридски – 8 Декември повеќе од една деценија е државен празник и е неработен за сите граѓани на Република Северна Македонија. хс/дма/

Фото: МИА