Според истражувањето на угледниот „Економист“, за индексот на демократија во светот, С. Македонија повеќе не е рангирана како „хибриден режим“ и влезе во зоната на функционални демократии како „демократија со недостатоци“ според ова мерење, вели премиерот Димитар Ковачевски.
Според критериумите кои се измерени во истражувањето, функционалноста на Владата е во континуиран раст од 2017 година. Функционалноста на Владата и растот на оценките на Изборниот процес како критериуми, придонесуваат севкупниот резултат на мерењето да се врати на високо ниво кое последен пат е нотирано во 2006 година, од кога пак земјата се наоѓала во постојан пад кој кулминирал со дефинирање како „хибриден режим„ во 2016 година.
-Не така одамна бевме сведоци колку е опасно кога демократски назадуваме. Заради претходната власт и автократското владеење бевме рангирани како „хибриден режим“. Остануваме посветени на унапредување на правата на граѓаните и медиумите градејќи слободно општество, нагласува премиерот Ковачевски во пишаната изјава што ја пренесува владината прес-служба.
Индексот на демократијата на Македонија според „Економист“ е подобрен за пет места што е голем успех во време кога демократијата назадува во светски рамки. Во споредба со 2020 година кога беше рангирана на 78 место од 167 земји за 2021 година земјава бележи скок од пет места и сега е рангирана на 73 место.
Според критериумите по кои се врши рангирањето, Македонија во четири од вкупно пет категории има оценки над просечната од 6.03. Најдобра е во делот на изборен процес и плуразлизам – 7.42, во кои има континуиран напредок, наведува Ковачевски во пишаната изјава.
