КОВИД СОСТОЈБА: Македонија неделава очекува олабавување на мерките, а од идниот месец во Грција се дига рампата и за невакцинирани

Од вкупниот број тестирања во текот на вчерашниот ден, позитивни се околу 2,4 проценти од новите случаи или 23 новозаболени на 953 тестирања, од кои еден е случај на реинфекција. Најголем број новозаболени има во Скопје – 19, како и најмногу активни случаи – 621.

Согласно податоците од Институтот за јавно здравје, во текот на вчерашниот ден починато е едно лице на 80-годишна возраст во болнички услови со коморбидитети.

Забележани се 190 оздравени пациенти, со што бројот на активни случаи на ниво на држава е 1.211.

Во текот на оваа недела се очекува Владата да ги прифати мерките што Комисијата за заразни болести ги предложи минатата недела, односно укинување на задолжително носење маски во затворен простор, со исклучок на здравствените установи, аптеки, јавен превоз и домови што згрижуваат лица. Исто така, препорачано е да не се следат контактите на новозаболените.

Засега остануваат актуелните мерки, учениците од средните и основните училишта немаат обврска да носат заштитна маска во училиштата, а дозволено е да се организираат училишни екскурзии. Студентите повторно ја следат наставата со физичко присуство, но задолжително е носење заштитна маска. Исто така, зголемен е капацитетот на отворен и затворен простор од досегашниот до 75 проценти, како и укинување на обврската за задолжително поседување сертификат за вакцинација или прележаност во отворениот дел на угостителските објекти и во шопинг центрите.

Во Грција вчера беа утврдени актуелните мерки што ќе важат до 18 април оваа година. За влез во земјата потребно е европски дигитален сертификат за КОВИД-19, поврзан со вакцинација, прележана болест или негативен резултат по направен ПЦР или рапид тест. Непроменета останува и мерката за задолжително носење маска за сите затворени простори, а за влез во сите објекти, потребен е документ за Ковид-19 кој се скенира со специјална апликација. Исклучок се маркетите, аптеките, продавниците за храна и бензинските пумпи.

Но, од 1 мај, во Грција се укинуваат сите мерки за влез, што значи слободно ќе патуваат сите кои имаат намера, односно и невакцинираните лица.

Досега во земјата се направени вкупно 1.984.493 тестирања на КОВИД-19. Вкупната бројка на КОВИД-дијагностицирани лица во нашата земја од почетокот на епидемијата изнесува 307.817, бројот на оздравени пациенти е 297.354, на починати е 9.252, а бројот на активни случаи изнесува 1.211.