Германскиот трговски синџир Лидл ја регистрира својата компанија во Македонија, а ќе биде управувана од бугарската филијала.
Како што објави порталот Фактор, една од најголемите компании во малопродажбата во светот во петокот ја регистрираше подружницата Лидл С. Македонија Дооел со седиште во скопски Центар и со паричен влог од 500.000 евра, објави вчера Централен регистар.
Сопственик е германската матична компанија ВЕ-Интернационал Цвајте ГмбХ од Некарзулм, но субјектот специјализиран за трговија на мало претежно со храна, пијалаци и тутун ќе биде управуван од Софија, од бизнисмените Милена Емилова Драгијска, Бисер Борисов Инчовски и Љубомир Манолов Хрсев. Според описот на нивните надлежности и ограничувања, „Лидл“ планира да вложи над 10 милиони евра во продавница и да купи земјиште поголемо од 10.000 квадратни метри.
Минатата година се пишуваше за интересот на Лидл да стартува со една продавница во Македонија, односно со објект кој сам ќе го гради, но истата информација остана непотврдена.
Во моментов Лидл има 100 продавници во Бугарија на 49 локации и вработува 3.000 работници, а има експанзионистички план за оваа година за отварање на уште пет маркети и вработување на уште 250 луѓе.
Лидл во Србија е присутен од 2018 година и досега има вкупно 41 објект. Во Хрватска работи од 2006 година. Трговскиот синџир оперира во 30-тина земји во Европа, со околу 11.000 продавници, а присутен е и во САД. „Лидл“ секој ден опслужува по околу 10 милиони купувачи.
Како што е веќе објавено, желбите за купување во Лидл, граѓани на Македонија ги задоволуваат со организирани и поединечни посети во Врање во соседна Србија.
Извор: Фактор
