Берлин објави дека нема да испорачува оружје на Украина поради можен конфликт со Русија. Тоа го потврди германската министерка за одбрана Кристин Ламбрехт.
„Можам да ја разберам желбата да ја поддржиме Украина, но токму тоа веќе го правиме. Украина во февруари ќе добие комплетна теренска болница, заедно со потребната обука, која е кофинансирана од Германија во износ од 5,3 милиони евра (6,01 милиони долари)“, изјави Ламбрехт во интервју за весникот „Велт ам Зонтаг“.
Таа потсети дека тешко ранети припадници на украинските сили веќе се лекуваат во Германија и нагласи дека Берлин засега не е подготвен да го снабди Киев со оружје.
„Мораме да направиме се за да спречиме ескалација. Во моментов испораката на оружје не би била корисна, а за тоа има договор во Владата на Германија“, изјави Ламбрехт.
Германскиот канцелар Олаф Шолц повтори дека политиката на Берлин е да не доставува оружје во конфликтните зони.
