Рускиот министер за надворешни работи Сергеј Лавров денеска изјави дека САД сакаат да воспостават „шатл дипломатија“ за време на разговорите во Ријад, Саудиска Арабија.
„Во контактите пред овој состанок во Ријад со Вашингтон, се почувствува дека Американците сакаат да ги стават Украинците и Русите во соседните простории и да спроведат шатл-дипломатија меѓу нив. И да издадат некаква обединета изјава“, рече тој во интервју за руската телевизија Канал 1.
Лавров изјавил дека поранешниот американски претседател Џозеф Бајден направил колосална грешка инсистирајќи на членство на Украина во НАТО и со тоа, како што оцени, „го напуштил дијалогот со Русија и почнал да претставува закана за неа“, пишува рускиот портал РБЦ.
Шефот на руската дипломатија истакна дека европските лидери покажуваат неспособност кога разговараат за можноста за испраќање на нивните мировни сили во Украина и додаде дека руско-американскиот дијалог за стратешка стабилност мора да се обнови.
„Се разбира, ова може да се направи само врз основа на враќање на принципите што ја формираа основата на Договорот за намалување на стратешкото оружје“, рече тој, истакнувајќи дека Русија се залага за преговори со САД во сите области.
Според него, пред средбата во Ријад, руската страна им објаснила на американските претставници дека не сака да прифати недокажани документи за конфликтот во Украина и дека „тие мора да бидат доверливи“, пренесува Танјуг.
„Уште еднаш објаснивме за што разговараа нашите претседатели, имаме апсолутно јасно разбирање дека тие се согласија да продолжат понатаму за да биде сè доверливо и дека никој повеќе не прифаќа неосновани документи“, рече рускиот министер.
Лавров нагласи дека Русија во моментов е „доктринално непријателски расположена“ кон САД, така што, како што наведе, нема смисла да се зборува за стабилност.
