Ле Монд за Северна Македонија: Неизвесно е гласањето во грчкиот парламент

Француските медиуми опширно пишуваат за дадената согласност на Македонскиот парламент за промена на Уставното име на Република Македонија во Република Северна Македонија, јавува дописникот на МИА.

Француското меѓународно радио, насловува: „Македонија: историски договор во Парламентот за промена на името“, понатаму се наведува дека ова „е крај, или скоро крај, на старата кавга меѓу Грција и Македонија. При историското гласање „Македонскиот парламент прифати да и даде ново име на земјата која отсега ќе се вика „Република Северна Македонија“. Договор кој според РФИ ќе и дозволи на Македонија целосно да се интегрира во меѓународната заедница, како зачленување во НАТО и почеток на преговори за членство во ЕУ..

Сите француски и франкофонски медиуми забележуваат дека резултатот од гласањето било „тесeн“ со само еден глас повеќе од потребното мнозинство и оти опозицијата од десницата не зела учество, освен дел од неа која гласала заедно со парламентарното мнозинство. Ова е резимирано од страна на „Курие Интернатсионал“, а притоа се нагласува дека „Ако Македонија сега го ратификувала договорот (од Преспа) сега на потег е грчкиот парламент“. Францускиот неделник го пренесува пишувањето на порталот „Политико“ од Брисел дека Алексис Ципрас се мачи да го обезбеди мнозинството по ова прашање но гласањето ќе биде во наредните седници.

– „Ако помине, Македонија ќе му се приклучи на НАТО до крајот на годината“, во тој контекст агенцијата АФП, се осврнува на посетата на Ангела Меркел на Атина, каде таа ја поздрави „одлучувачката улога на Алексис Ципрас кој се зафати да го реши ова трнливо прашање“ за новото име на Македонија. Како што АФП, ја пренесува изјавата на Меркел дека „Договорот ќе и дозволи на Северна Македонија да стане членка на НАТО и ЕУ“ и оти овој договор е од интерес на сите, на Македонија, на Грција, на цела Европа“.

Угледниот париски „Ле Монд“ нагласува дека процесот за историскиот договор склучен во јуни меѓу Скопје и Атина беше „долг и полн со пречки“. По одлуката на Македонскиот парламент, сега Атина е таа која треба да го исполни својот дел од договорот, за да се стави крај на спорот стар триесет години. Според „Ле Монд“ гласањето во грчкиот парламент се очекува до крајот на месецот и тоа е неизвесно.

Интересно е дека во сите текстови посветени на уставните промени, франкофонските медиуми пишуваат „Македонија“, „Македонски парламент“, или како што напиша париски „Ла Круа“ непосредно пред гласањето  под насловот „Епилог на повидок за новото име на Македонија“, во кое го цитира шефот на македонската дипломатија кој пред околу еден месец беше во Париз и каде на повеќе пати повтори „Ние ќе останеме Македонци, ние ќе продолжиме да зборуваме македонски“, со други зборови како што заклучува весникот земјата нема да ја изгуби својата душа, викајќи се „Република Северна Македонија“, потсетувајќи на зборовите на Димитров во Париз пред фондацијата Роберт Шуман „Чудата се можни, па дури и на Балканот“ – невозможното парламентарно мнозинство беше најдено во Македонија. Сега на ред е чудото во Грција.