Директорот на ФЗОМ од редовите на СДСМ, Стево Крстевски, согласно неговиот јавно објавен анкетен лист поседува личен имот, кој вклучува станови, удели, депозити, куќа и тоа во вкупна вредност од околу 16 милиони денари, несметајќи го и дополнителниот имот на неговиот брачен другар, кој исто така воопшто не е за потценување, реагираат од партијата Левица, потенцирајќи дека најголем дел од имотот е стекнат за време на владеењето токму на СДСМ.

Гледајќи ја вкупната сума на имотот кој тој го поседува, велат од Левица, легитимно е да се постави прашањето на кој начин истиот ги стекнал средствата за купување на овие недвижности, како и дали во тие средства се вклучени и финансии кои Стевчо Крстевски ги стекнал преку вршење на договорени услуги кон државата?!

-Дополнително, вредноста на објавениот имот, по сите економски параметри, не може да биде стекната само од државната плата која Стево Крстевски ја добива како директор. За споредба, на обичниот работник кој заработува минимална плата му требаат скоро 90 години за да успее да го заработи ваквиот имот. Ова само ја истакнува лажната слика која од СДСМ се обидуваат да ја наметнат дека наводно се борат за правата на обичните работници, како и фактот дека само при владеење на хибриден режим е можно стакнување на вака голем имот во рекордно кратко време. Потсетуваме дека се работи за директор кој е партиски послушник на владејачката криминална клика и кој, противзаконски и насилнички, деградира од работни места роднини на истакнати членови на Левица, велат од партијата.

За вакви ситуации, додаваат, кога е евидентно постоење на основи за сомневање за незаконско богатење, јавноста очекува одговори и јавноста мора да доби одговори.

Дополнително, како партија ја повикуваме Државната комисија за спречување корупција, да постапи согласно своите надлежности, утврдени со Законот за спречување корупција и судирот на интереси и да преземе соодветни мерки и активности за истражување на наведениот случај, реагираат од Левица.

Директорот на Фондот за здравствено осигурување, Стево Крстевски во изјава за „Фокус“ вели дека наводите  во денешното соопштение од политичката партија Левица не ги смета за обвинувања се додека на тоа, надлежната и одговорната институција во државата, не отвори или спроведе постапка согласно Законот.

Можам да кажам дека во таков случај подготвен сум да ги дадам сите потребни одговори и да ги обезбедам сите докази. Во оваа пригода,  сакам да изјавам дека сиот мој имот и имотот на моето семејство е стекнат на легален начин и уредно и навремено пријавен согласно закон до надлежните институции меѓу кои и анкетен лист до ДКСК.

Ги охрабрувам надлежните институции кои сметаат дека треба да се заинтересираат за сè погоре што е кажано, да постапат според правилата кои им го наложуваат  тоа, за што им стојам на располагање јас лично и институцијата која ја раководам, вели Крстевски.

Но, тој додава дека ако евентуалната постапка покаже дека не постои никаков прекршок од неговата страна, ќе поднесе тужба.