МАКЕДОНЦИТЕ ОД АЛБАНИЈА: Нека ни е честит националниот празник Илинден и нека е вечна нашата татковина Македонија

Македонското друштво „Илинден“ – Тирана, по повод 2 Август – Илинден, Денот на Републиката, упати честитка до сите Македонци ширум светот. 

-Почитувани Македонци и Македонки во Република Албанија и насекаде во светот, од име на македонско друштво „Илинден“ најсрдечно Ви го честитаме Денот на Републиката, втори август и двата историски Илиндена, 118 години од Илинденското востание и 77 години од Првото заседание на АСНОМ. Нека ни е честит националниот празник Илинден и нека е вечна нашата татковина, Македонија, стои во честитката.  

Се додава дека Илинден е ден кога ги славиме и се присетуваме на голем број револуционери и борци, кои со својата крв ги испишаа најславните страници од историјата на македонскиот народ.  

-Да го почитуваме и славиме  Денот на двата ИЛИНДЕНА, со почит, гордост и достоинство, како што му прилега на овој голем ден, се наведува  во честитката потпишана од претседателот на друштвото Никола Ѓурѓај.

Друштвото постира и фотографија од илинденски излет на Македонците во Тирана во 1937 година.