Охридскиот договор донесе придобивки за сите заедници во нашата држава, но имаме уште долг пат кој треба да се изоди за негова целосна имплементација, заклучија панелистите на денешната тркалезна маса „Важноста на Рамковниот договор за помалубројните заедници“ што се одржа во организација на Агенцијата за остварување на правата на заедниците (АОПЗ) и Министерството за политички систем и односи помеѓу заедниците.

Првиот вицепремиер и министер за политички систем и односи помеѓу заедниците Артан Груби истакна дека нормативниот дел на Охридскиот рамковен договор е веќе усвоен од страна на институциите на нашата држава, но наша задача е секојдневно имплементирање на тој нормативен дел кој што ќе биде постојан и секојдневен затоа што станува збор за имплементација на Устав и закон.

– Охридскиот договор донесе придобивки за сите и сакам да ја повторам условноста на лојалноста помеѓу граѓанинот и државата – колку е полојална државата кон граѓанинот и заедницата, толку се полојални граѓанинот и заедницата кон државата. Денес гледаме многу полојални граѓани, заедници кон нашата заедничка држава, затоа што всушност државата стана полојална кон сите нас согласно одредбите на Рамковниот договор. Секако дека одржлив развој не е возможен доколку некој биде оставен на маргините на општеството. Благодарение на Охридскиот договор, денеска, покрај македонскиот и албанскиот јазик, имаме општини каде официјален јазик се и ромскиот, турскиот, босанскиот, српскиот, а припадниците на овие заедници веќе се интегрирани во сите сфери на општеството, иако се уште не во посакуваните и соодветните бројки, рече Груби.

Охридскиот договор, потенцира тој, донесе нови можности за сите заедници, донесе можности за сите нас еднакво да се вклучиме во развојот на државата. Тој истакна дека малку се мирновните договори во светот кои што можат да се карактеризираат како успешни, а Охридскиот рамковен договор, како што рече, е апсолутно успешна приказна за сите.

Џефри Голдстин, вршител на должноста шеф на Мисијата на ОБСЕ во Скопје, истакна дека мора да признаеме оти се уште има потреба за подобрување на имплементацијата на законодавство, на стратегиите, на акционите планови, особено во однос на правичната застапеност, употребата на јазиците, образованието и културата.

– Еден од клучните приоритети на ОБСЕ е да и се помогне на државата во креирањето и имплементацијата на политики, односно унапредувањето на правата и институциоиналната рамка преку која сите заедници можат да ги уживаат своите права и активно да учествуваат во сите сфери на јавниот живот. Мисијата на ОБСЕ во Скопје ќе продолжи да ги поддржува напорите за промовирање на правата на заедниците во согласност со Националната стратегија за едно општество и интеркултурализам, рече тој.

Еран Куртиш, директор на Агенцијата за остварување на правата на заедниците (АОПЗ), потенцира дека придобивките од Охридскиот договор за сите заедници се видливи, но, како што рече, има уште долг пат кој треба да се изоди.

– Охридскиот договор стави крај на меѓуетничките тензии каде заедниците во нашата земја беа маргинализирани. Овој договор ни ги отвори портите кон пристапување и асоцијација во Европската Унија и НАТО. Денес, по 20 години од потпишувањето на овој Договор сме членка на НАТО. Придобивките за сите нас, за сите заедници од Охридскиот договор се видливи, но имаме уште долг пат кој треба да се изоди. Охридскиот договор не е договор меѓу Македонците и Албанците со кој се заврши внатрешниот конфликт, туку е договор за унапредување и интеграција на сите заедници во РС Македонија. Во наредниот период работата и фокусот мора да биде на имплементација во целост, рече Куртиш.

Вицепремиерот Груби спомна и неколку настани што ќе се организираат на денот на одбележување на 20-годишнината на Охридскиот рамковен договор. На 13 август ќе се одржи конференција со бројни гости во 10 часот во хотел „Александар палас“, по која ќе следи концерт на тенорот Рам Лахај и Филхармонијата во 17 часот во објектот на Филхармонијата.