Македонија надмина 5 000 жртви од Ковид 19, но вчера само половина повикани се вакцинирале – причина застрашувачките гужви?

Од 9 илјади закажани термини за вакцинација против Ковид-19, вчера на пунктовите низ цела земја дошле 4.500 граѓани, кажа денеска министерот за здравство Венко Филипче.

Во земјава досега се вакцинирани 66.086, а пријавени се 245.287. Во вкупната бројка не влегуваат околу 15.000 граѓани кои се вакцинираа во Србија.

Ова се случува и покрај фактот дека денеска, со новите 24 жртви од КОвид 19, Макеоднија во која, според Филипче „се е под контрола“ кога е во прашање епидемијата, ја надмина бројката од над 5000 мртви или повеќе од 2 500 на милион жители.

Но, тоа не придонесува сите пријавени да се јават за вакцинација. Причината веројатно треба да се бара во неорганизираноста и во големите гужви пред пунктовите, посебно тој во скопската сала „Борис Трајковски“, што само по себе е доволно застрашувачки. Дилемата е како да и верувате на власт на министер, кој не е способен ниту ова да го организира.

„Ќе се обидеме денеска да видиме и да го идентификуваме проблемот. Искрено, верувам дека одзивот нема да биде ваков и понатаму. Можеби и затоа што е прв ден, можеби затоа што е почеток на ваков систем за масовна вакцинација. Секој од пријавните граѓани ќе добие термини. Апелирам уште еднаш граѓаните да се пријават на сајтот за вакцинација“, кажа денеска министерот на најавата за реновирање на Онколошкиот оддел на Клиниката за детски болести во вредност од 125 илјади евра.

Министерството за здравство претпладнево апелираше граѓаните кои добивале смс пораки за да се вакцинираат во друг град, а не каде што живеат и вчера не дошле за вакцинирање против ковид-19, треба да дојдат денеска во местото каде живеат, односно на вакциналниот пункт во нивниот град. Ова важи за сите граѓани кои и денеска или во наредните денови ќе се соочат со овој проблем.

Појаснувањето на Министерството следи откако граѓаните на социјалните мрежи реагираа дека за вакцинација добивале смс пораки за да се вакцинираат во друг град, а не каде што живеат, и дека системот Мој термин направил анализа.

„Не е потребно граѓаните повторно да се пријават ниту на вакцинација.мк ниту кај својот матичен лекар, доволно е кога ќе дојдат на вакциналниот пункт да ја покажат пораката која ја добиле односно каде пишува дека вчера имале термин за вакцинација“, вели Министерството.