Дваесет и двегодишна девојка од Македонија загина во несреќен случај на своето работно место во Данска, објави порталот А1он.
Според данската полиција, настраданата девојка работела како хигиеничарка во училиште, каде што се случила несреќата со машина за чистење.
Данските медиуми јавуваат дека таа била пренесена во болница со тешки повреди на кои им подлегнала.
– Ние сме во процес на спроведување дополнителни истраги и повторно ги испрашуваме истите сведоци, објаснува Торбен Витендорф од данската полиција.
Според данските медиуми, роднините на девојката се веќе известени.
Данската управа за работна средина е повикана и мора да биде вклучена во истрагата.
