Документарниот филм „Медена земја“ во режија на Љубо Стефанов и Тамара Котевска влезе во потесен круг за наградите Оскар во две категории – за документарци и за странски филм, за 92-то доделување кое ќе се одржи на 9 февруари во Лос Анџелес.
Американската филмска академија синоќа објави скратени листи за номинации за Оскар од филмовите што се кандидати за престижната награда.
Нашиот филм е меѓу 15 остварувања кандидадти за најдобар документарен филм селектирани од 159-те пријавени во оваа категорија.
Исто така, „Медена земја“ влезе и во потесен круг од 10 филмови за Оскар за најдобар меѓународен долгометражен филм, категорија во која беа кандидирани 91 филм. Конкуренција на нашиот филм во оваа селекција му е новиот филм на шпанскиот режисер Педро Алмодовар „Болка и слава“ и јужнокорејскиот „Паразит“ на Бонг Јон-хо (добитникот на „Златна палма“) и уште седум филмови од Чешка, Естонија, Франција, Унгарија, Полска, Русија и Сенегал.
Номинираните во сите категории Академијата ќе ги соопшти на 13 јануари 2020.
Нашиот филм овој месец беше меѓу петте номинирани за најдобар документарец на Европските филмски награди за 2019. Во низата награди што ги доби овој месец е и признанието од „Њујорк тајмс“ за најдобар во 2019, две признанија на Интернационалните документарни награди во Лос Анџелес, најдобар документарец според њујоршките филмски критичари…
