Медиахолдингот Allen Media Group во сопственост на Бајрон Ален, поранешен стендап-комичар а сега продуцент и медиумски магнат, соопшти дека го тужи McDonald`s, ланец ресторани за брза исхрана. Компанијата бара исплата од 10 милијарди долари поради „расна дискриминација во нарушување на федералните закони“.
Во тужбата се наведува дека фаст фуд рестораните покажувале предрасуди во политиката за рекламирање, односно одбивале да склучат договор за реклама со медиумската компанија Entertainment Studios и ТВ каналот The Weather Channel, вклучени во Allen Media Group.
-При годишен рекламен буџет од 1.6 милијарди долари, компанијата троши само 5 милиони долари за рекламни договори во медиуми чии сопственици се Афроамериканци, се вели во соопштението по повод тужбата.
Тужителите на тој начин укажуваат дека одлуките за рекламирање на фаст фуд ланецот се засновани на „расни стереотипи“ и поттикнуваат расна дискриминација.
McDonald`s за американските медиуми соопшти дека ќе одговори на тужбата во судска расправа, додавајќи дека оттаму веќе ги менуваат позициите со „значајно зголемување на буџетите за реклама во медиумите во сопственот на етничките групи“.
Меѓудругото, во наредните четири години McDonald`s планира за два и пол пати да ги зголеми трошоците за рекламни договори со медиумски компании на Афроамериканци.
